Kuzhinë për fëmijë. Akullore me kos dhe boronica

Është shumë e thjeshtë të bëni me duart tuaja akullore me kos dhe boronica bashkë me fëmijët. Mjaftojnë pak përbërës të cilët mund të ndryshojnë sipas shijeve tuaja: boronicat mund të zëvendësohen me kajsi, pjeshkë ose qershi. Të vegjlit tuaj do të kënaqen pa masë!

Përbërësit për 7/8 akullore:

• 100 gr pana
• 200 gr kos grek
• 50 gr sheqer pluhur
• 7/8 lugë kafeje reçel boronice
• Meringe (mafishe të vogla) sipas dëshirës
• 7-8 gota plastike ose kartoni si ato të kafesë (për t’u dhënë formën akulloreve)
• Shkopinj druri për akullore

Përgatitja:

1. Rrihni panën, përziejeni me kosin dhe sheqerin pluhur dhe përziejeni mirë masën.
2. Nëpër gota vendosni meringat, shtoni pak nga kremi i përgatitur dhe nga një lugë reçel boronice.
3. Më pas hidhni përsëri pana, nivelojini me lugë dhe vendosni nga një shkop tek secila.
4. Në fund vendosini në frigorifer për 3 orë. Pastaj hiqini nga format dhe shijojini bashkë me fëmijët.