U largua fëmijë drejt Italisë me gomone, kuzhinieri Bleri Dervishi kthehet në atdhe me një restorant që synon të ndryshojë gastronominë shqiptare

Historia e Bleri Dervishit është një nga ato rrëfime që lidhin emigracionin, suksesin dhe rikthimin në atdhe. I larguar nga Shqipëria në moshën katër vjeçare me familjen e tij drejt Italisë, ai ndërtoi atje formimin dhe karrierën si shef kuzhine, për t’u rikthyer vite më vonë në vendlindje me një mision të qartë: të tregojë potencialin e gastronomisë shqiptare.

Këtë qershor, në fshatin Karakullak pranë Elbasanit, pritet të hapet Krohn, një restorant i ri i gastronomisë së lartë që do të ketë në qendër të menusë mishin e gjahut, mishin e drerit dhe produktet e egra të natyrës shqiptare.

I lindur në Korçë në vitin 1993, Dervishi emigroi me familjen në Itali në fillim të viteve ’90. Atje u formua profesionalisht në shkollat e hotelerisë dhe punoi pranë emrave të njohur të gastronomisë europiane, mes tyre Alain Ducasse dhe Terry Giacomello, duke fituar përvojë edhe në Spanjë.

Megjithatë, pavarësisht suksesit jashtë vendit, ai vendosi të rikthehej në Shqipëri. Pas fitimit të edicionit shqiptar të MasterChef në vitin 2015 dhe eksperiencës me restorantin Gzona në Tiranë, tashmë ai po nis projektin që e konsideron më personalin e tij.

“Familja ime vazhdon të jetojë në Itali, por unë zgjodha të kthehem në Shqipëri. Doja të tregoja se mund të ndërtohet diçka e rëndësishme edhe këtu dhe të inkurajoja të rinjtë të besojnë më shumë te vendi i tyre”, shprehet Dervishi.

Krohn do të mbështetet jo vetëm te produktet e gjahut, por edhe te një kopsht me fara të vjetra shqiptare, të ruajtura prej brezash nga fermerët e zonës. Ideja është që çdo pjatë të tregojë një histori autentike shqiptare, por të prezantuar me teknikat dhe standardet e gastronomisë moderne.

Menuja do të ndryshojë sipas sezonit dhe do të përfshijë rreth 20 pjata, me çmime që variojnë nga 5 deri në 30 euro. Ndër specialitetet e para të menduara nga shefi janë pappardelle me ragù gjahu, lazanja me mish gjahu, mish dreri me qepë dhe derr i egër me mollë e kanellë.

Objektivi i Dervishit është ambicioz: ta kthejë një fshat pranë Elbasanit në një destinacion gastronomik që tërheq vizitorë nga e gjithë Shqipëria dhe më gjerë.

Pas viteve të suksesit dhe eksperiencës në Itali, shefi i kuzhinës po rikthehet aty ku nisi gjithçka, me bindjen se kuzhina shqiptare ka ende shumë histori për të treguar.