Bruschetta me pjeshkë, burrata dhe mjaltë, kombinimi perfekt për mbrëmjet e verës

E ëmbël, kremoze, krokante dhe pak e kripur: bruschetta me pjeshkë dhe burrata është një nga ato receta ku pak përbërës krijojnë një rezultat shumë më interesant nga sa prisni.

Përbërësit për 6–8 bruschetta

• 1 baguette ose bukë rustike
• 2 pjeshkë të pjekura por të forta
• 200–250 g burrata
• 2 lugë gjelle vaj ulliri ekstra i virgjër
• 1–2 lugë gjelle mjaltë
• 6–8 gjethe borzilok të freskët
• Kripë
• Piper i zi

Opsionale:

• Pak lëkurë limoni
• Pak chili flakes

Përgatitja

Priteni bukën në feta rreth 1.5 cm të trasha. Lyejini lehtë me vaj ulliri nga të dyja anët.

Piqini në një tigan grill, skarë ose në furrë në 200°C për rreth 5–8 minuta, duke i kthyer nëse është e nevojshme, derisa të jenë krokante dhe të kenë marrë ngjyrë të artë.

Pritini pjeshkët në feta.

Për një shije më të freskët mund t’i përdorni të gjalla. Nëse dëshironi më shumë ëmbëlsi dhe aromë, vendosini për 1–2 minuta nga secila anë në një tigan grill shumë të nxehtë, pa i zbutur tepër.

Hapni burratën dhe shpërndajeni mbi fetat e bukës së thekur. Vendosni sipër fetat e pjeshkës.

Hidhni një fije të hollë mjalti, pak vaj ulliri, një majë të vogël kripe dhe piper të zi të sapobluar.

Përfundojeni me borzilok të freskët. Nëse dëshironi, shtoni pak lëkurë limoni të grirë shumë imët ose disa chili flakes për kontrast.

Shërbejini menjëherë, që buka të mbetet krokante dhe të mos zbutet nga burrata.

Këshillë NEPS: Pjeshka duhet të jetë aromatike dhe e pjekur, por ende e fortë. Nëse është shumë e butë, do të shpërbëhet mbi bruschetta.