Foto-recetë/Tiramisu shtëpie në tavë

Tiramisuja është një ndër ëmbëlsirat më të preferuara në vendin tonë. Ajo rezulton gjithashtu edhe si një ndër më të shiturat në pastiçeritë e vendit dhe shumë e konsumuar edhe në restorante.

Shija e biskotave specifike për tiramisunë, kafeja, por edhe një sërë elementësh të tjerë e bëjnë këtë ëmbëlsirë të njohur italiane, t’i meritojë të gjithë komplimentet.

Tani e vërteta është, se kur e përgatit vetë, merr dyfsh kënaqësi.

Prandaj, si thua, nisim nga puna?

Çfarë na nevojitet:

• 500 gram djathë Mascarpone
• 6 vezë të freskëta  (të verdhat veç nga të bardhat)
• 1 pako Hoopla
• 120g sheqer
• 4 lugë kafe turke ose ekspres (të zierë për 5 minuta në një tenxhere me ujë)
• 1/2 gotë me sheqer
• 300-400g biskota Savoiardi
• kakao e hidhur për spërkatje në fund

Përgatitja: 

• Rrahim me rrahësin elektrik të verdhat e vezëve dhe sheqerin derisa të bëhen si shkumë, afërsisht pesë minuta.
• Djathin Mascarpone e punojmë pak me pirun ose me lugë që të bëhet si krem dhe e shtojmë në tasin me të verdhat e vezëve. Vazhdojmë ta përziejmë me rrahësin elektrik një deri në dy minuta.
• Bëjmë marengë me të bardhat e vezëve, i shtojmë tek tasi i kremit dhe i përziejmë me kujdes nga poshtë lart me spatula ose me lugë druri.
• Rrihni me rrahës elektrik dhe hooplan dhe i përzieni të tri masat bashkë.
• Biskotat i lagim tek kafeja e vakët (nuk duhet të qullen shumë) dhe i vendosim në tavë pranë njëra-tjetrës duke krijuar një shtresë, hedhim sipër një shtresë me krem, vazhdojmë me një shtresë tjetër biskotash me kafe dhe përsëri një shtresë kremi.
• E spërkasim me kakao të hidhur.

• E mbulojmë me letër alumini ose me qese kuzhine dhe e lëmë në frigorifer për një natë. Ju bëftë mirë!