Soufle me limon. E thjeshtë, e lehtë, aromatike

E butë, me shije delikate dhe aromë të mirë, sufleja me limon është një ëmbëlsirë vërtet e shijshme, e thjeshtë për t’u përgatitur dhe shume e dashur edhe nga fëmijët. Një ëmbëlsirë perfekte për të mbyllur vaktet me shije, sidomos nëse keni të ftuar.

Le të shohim bashkë si përgatitet:

Për kremin

• 8 të verdha vezësh
• 70 gr sheqer
• 60 gr miell
• 350 ml qumësht
• Lëkura e grirë e dy limonëve
• Lëngu i një limoni

Për meringën

• 8 të bardha vezësh
• 90 gr sheqer

Përgatitja:

1. Për të filluar, ndani të bardhat nga të verdhat dhe më pas punoni të verdhat me 70 gram sheqer derisa të merrni një masë shkumoze. Shtoni miellin dhe qumështin e vakët e më pas gatuajeni kremin në zjarr të ulët për 1-2 minuta.
2. Shtojini kremit lëkurën e grirë të dy limonëve dhe lëngun e një limoni e më pas përziejini mirë. Rrihni të bardhat me sheqerin e mbetur, shtoni kremin dhe përziejini me kujdes derisa të merrni një përbërje homogjene.
3. Hidheni përbërjen nëpër forma të lyera me gjalpë duke lënë 1 cm bosh.
4. Piqini per 10 minuta në 170-180 grade C.