Ushqimi është një dashuri më vete, pa të cilën e kemi të pamundur të jetojmë! Persona të ndryshëm kanë shije të ndryshme dhe sigurisht shije tradicionale që nuk mungon kurrë në tryezat e familjes.
Kështu edhe moderatorja Orinda Huta nuk ka shumë naze sa i përket ushqimit, madje ajo ka zbuluar se bamjet janë një nga ushqimet e saj të preferuara.
Që të shijoni bamje me mish si Orinda, hidhini një sy recetës së mëposhtme:
Bamjet pastrohen duke u prerë bishtin në formë konike, spërkaten me uthull e kripë dhe lihen për disa kohë që t’u zbutet pushi.
Copat e mishit skuqen bashkë me qepët e grira hollë, pastaj shtohen domatet ose salcë domatesh.
Pasi të jenë përzier të gjitha së bashku, u hidhet kripë, piper i zi, fletë dafine dhe zihen në zjarr të ngadaltë për disa minuta.
Mishi vihet të zihet në të njëjtën kohë me bamjet.
Bamjet shpërlahen, kullohen dhe skuqen pak në tigan me yndyrë.
Në një tenxhere të cekët shtrohen feta domatesh, rreth e qark bamje të reshtura me bisht anash dhe majat në mes, duke spërkatur çdo rresht me majdanoz e piper të zi.
Në mes të tenxheres në vendin e zbrazët, vendoset mishi, hidhet lëngu, vihet brenda një pjatë porcelani e përmbysur në mënyrë që ato të ruajnë formën gjatë zierjes dhe pastaj kapaku.
Gjella vihet në zjarr të ngadaltë derisa të bëhet gati. Në fund ajo vendoset në pjata, ku në mes vihet mishi, ndërsa anash bamjet e rreshtuara bukur, duke u hedhur sipër lëngun e vet dhe majdanoz të grirë hollë.
Lini një koment