Eshtë sezoni i tyre! Ja receta për japrakët me gjethe rrushi

Në një tas grijmë hollë qepët e njoma, majdanozin, menten, koprën.

Vëmë një tenxhere me ujë dhe kur të jetë në pikën e vlimit fusim spinaqin, labotin dhe pazin për 1 minutë dhe i nxjerrim.

I presim hollë dhe i bashkojmë me pjesën tjetër të jeshillëqeve. Tek kjo masë shtojmë kripë, vaj ulliri, rigon, nenexhik dhe një gotë oriz.

Për më shumë shije i grijmë dy rripa karote, kungull, spec të kuq, të gjitha të prera shumë imët.

Po tek ai ujë i valuar fusim për 1 minutë dhe gjethet e rrushit. I nxjerrim dhe fillojmë t'i mbushim një nga një duke i rrotulluar dhe mbështjellë.

Në një tenxhere shtrojmë gjethe rrushi dhe pak vaj ulliri. Sipër vendosim një nga një japrakët e bërë gati, i shtojmë ujë të valuar.

I mbulojmë me pjatë që të mos lëvizin.

I lëmë të ziejnë në zjarr të ngadaltë për rreth një orë.