Sallatë me mish pule e perime. Pjata ideale për ty që je në dietë!

Lajmë, thajmë barishtet rukolën e sallatën dhe i copëtojmë me dorë.

Presim fileton e pulës në feta të holla me trashësi 0,5 cm. e marinojmë atë me kripë e piper të zi dhe pasi kemi ngrohur vajin e skuqim atë nga të dyja anët deri sa të zverdhet pak.

Pasi të skuqen, i largojmë në një pjatë dhe i lëmë të ftohen. Limonin e lajmë mirë dhe e thajmë, e grijmë hollë lëkurën e limonit dhe e lëmë mënjanë.

Shtrydhim gjysmën e limonit në një tas dhe e bashkojmë me vajin, kripën, gjethe borziloku të grirë shumë hollë.

I trazojmë mirë dhe e lëmë mënjanë. Vendosim barishtet e pastruara në një pjatancë. Karotën dhe kastravecin i presim me qëruesen e patateve, specat të prerë shumë hollë në gjysmë rrathë, domatet qershi në gjysma dhe rrepat e kuqe të prera në feta ose gjysmë-feta.

Shtojmë lëkurën e limonit. Presim fileton e pulës në shirita me gjatësi 5 cm. Në fund përziejmë dresingun dhe marinojmë sallatën. Ju bëftë mirë!